Dana ibrahim Articles

کاراییه‌کانی راستیی گریمانه‌ 

دانا ابراهیم ئه‌ندامی فیده‌راسیۆنی جیهانی ئاینده‌توێژی

راستیی گریمانه‌(Virtual Reality) ته‌کنۆلۆژیایه‌کی نوێیه‌ و تا ئێستاش ھه‌موو کاراییه‌کانی دیاری نه‌کراون به‌ڵام ژماره‌یه‌کیان بریتین له‌:

یاری ڤیدیۆ

یه‌کێک له‌ به‌ربژێره‌کانی سه‌ره‌کی بۆ به‌کارھێنانی ئه‌م ته‌کنۆلۆژیا، یاری ڤیدیۆیه‌. به‌دیھێنانی ھه‌ستی ھه‌مه‌لایه‌نه‌ له‌ تاکدا و نوقم کردنی زیاتری له‌ که‌شوھه‌وای یاریدا له‌ ھێزه‌ مته‌ سه‌ره‌کیه‌کانی ئه‌م ته‌کنۆلۆژیایه‌. له‌ ئێستادا زۆرترین ژماره‌ی کۆمپانیا، به‌رھه‌مھێنه‌رانی ھێدسێت، به‌رنامه‌نووسان و کاربه‌ده‌ستانی به‌رھه‌مھێنانی ناوه‌رۆکی VR ، سه‌رنجیان له‌سه‌ر کارایی ئه‌م ته‌کنۆلۆژیایه‌ له‌ بواری یاریدا.

 

 وه‌رزش

ئه‌م ته‌کنۆلۆژیا، له‌ گۆڕه‌پانی وه‌رزشدا یارمه‌تی ده‌دات سنوورداربونی گۆشه‌نیگا نه‌مێنێت. له‌م شێوه‌دا ھه‌موو جووڵه‌ی وه‌رزشوانان و ساته‌کانی کێبڕکێ له‌ سووچگه‌لی جیاوازه‌وه‌ و به‌ گشتگیریی ده‌بینرێت. ته‌نانه‌ت ده‌توانیت له‌ دیمه‌نی ساتی سه‌رپێچی کردن و مشتومڕه‌کانی نێو یاریگای تۆپی پێ، له‌ ته‌نیشت یاریزانانی لایه‌نی خۆتدا بوونت ھه‌بێت. له‌ کۆتاییدا به‌ ئه‌م ته‌کنۆلۆژیا روانینێکی ته‌واوت پێ ده‌درێت بۆ رووداوه‌کانی کێبڕکێی ھۆکی، ماراسۆن و دیکه‌ی وه‌رزشه‌کان.

 

جیھانی گریمانه‌

له‌ دیکه‌ی کاراییه‌کانی VR، که‌شوھه‌وای گریمانه‌ی پێکھێنراوه‌ له‌ لایه‌ن به‌کارھێنه‌رانه‌وه‌ به‌ مه‌به‌ستی په‌یوه‌ندیی کۆمه‌ڵایه‌تی. گرنگیی له‌وه‌دایه‌ کۆمپانیاکانی High Fidelity  و   AltSpace VRله‌م بواره‌دا پێشه‌نگن.

 

زیاتربوونی ئاستی کارایی کۆمپانیاکان

ژماره‌یه‌ک کۆمپانیای بچوک و ھه‌ندێک له‌ توێژه‌ران له‌ دوی رێگایه‌ک ده‌گه‌ڕێن بۆ به‌کارھێنانی ته‌کنۆلۆژیای VR له‌ بواری په‌یوه‌ندیی کردن به‌ کۆمپیۆته‌ری سه‌رمێزه‌وه‌. وێنا بکه‌ن دسکتاپی کۆمپیۆته‌ره‌که‌تان فه‌زایه‌کی ٣٦٠ پله‌ بێت و سه‌یری ھه‌ر سوچێکی بکه‌یت، به‌ڵگه‌کان، زانیاریه‌کان، فایله‌کان و دیکه‌ی بابه‌ته‌کان که‌ له‌وێدا جێگیرتان کردون، له‌ ھه‌مان شوێندا بیانبینیت. چێژبه‌خشه‌، نه‌؟!

 

ھونه‌ر

ھه‌رچه‌نده‌ ئێستا به‌ ھێنانی قامک به‌سه‌ر ته‌خته‌ نمایشی ئامێره‌ ئه‌لکترۆنیه‌کاندا توانای ئافراندنی به‌رھه‌می ھونه‌ری له‌به‌رده‌ستدایه‌ به‌ڵام له‌ داھاتوویه‌کی نزیکدا به‌رھه‌مھێنانی کاری ھونه‌ری به‌ که‌ڵک وه‌رگرتن له‌ که‌شوھه‌وای سێ ره‌ھه‌ندیه‌وه‌ له‌ به‌رده‌ستدا ده‌بێت. له‌م پێکھاته‌یه‌دا له‌مپه‌ره‌ جه‌سته‌ییه‌کان به‌ ته‌واوه‌تی وه‌لاده‌نرێن و خه‌یاڵ و وێناسازیی تاکه‌که‌سی، گرنگیه‌کی زیاتری ده‌بێت بۆ ئافراندنی به‌رھه‌می ھونه‌ری.

 

فیلمی راستیی گریمانه‌ یان بوونی زیندوو له‌ شوێندا  (Live Event)

ته‌کنۆلۆژیای VR توانای خۆی سه‌لماندوه‌ بۆ نمایش کردنی راسته‌وخۆی کۆنسێرت، ھه‌واڵ و دیکه‌ی رووداوه‌کان. بۆ نموونه‌ ھه‌ندێک له‌ ئه‌ستێره‌کانی مۆسیقا وه‌کووPaul McCartney  و Jack White، لێگرته‌ی راستیی گریمانه‌ی کۆنسێرته‌کانی خۆیان بڵاو کردوه‌ته‌وه‌ و پێشوازیه‌کی چاکیشیان وه‌رگرتوه‌ته‌وه‌.

 

بیناسازی، رازاندنه‌وه‌ی نێوماڵ، مامه‌ڵه‌ی خانووبه‌ره‌

ماوه‌یه‌که‌ کۆمپانیا گه‌وره‌کانی بیناسازی و دیکۆری ناوماڵ، که‌ڵک وه‌رده‌گرن له‌ ئه‌م ته‌کنۆلۆژیا بۆ نمایش کردنی نێو و رواڵه‌تی ده‌ره‌وه‌ی خانوو بۆ کڕیاران به‌ شێوه‌ی گه‌ڕان له‌ ئه‌و شوێنه‌ تایبه‌ته‌دا و بینینی ره‌ھه‌نده‌ جیاوازه‌کانی.

 

گه‌ڕان له‌ ئینته‌رنێتدا

له‌ ئێستادا کۆمپانیای مۆزیلا له‌ سه‌روبه‌ندی توێژینه‌وه‌ و به‌کارخستنی پڕۆژه‌یه‌کدایه‌ بۆ ئه‌وه‌ی بتوانیت له‌ رێگای ھێدسێتی VR ناوه‌رۆکی وێب ببینیت و چالاکی تێدا بکه‌یت. له‌ ئه‌گه‌ری ده‌ستکه‌وتنی ئاکامی کرداریه‌وه‌، ئاڵوگۆڕێکی سه‌رسووڕھێنه‌ر له‌ بواری گه‌ڕان له‌ ئینته‌رنێتدا ده‌بینین و زیاتر له‌ پێش، سه‌رسام ده‌بین.

 

سایکۆلۆژی

رێگا گه‌ڵکی زۆر ھه‌یه‌ بۆ به‌کارھێنانی راستیی گریمانه‌ له‌ پزیشکیدا. بۆ نموونه‌ ده‌کرێت به‌کار بھێنرێت بۆ چاره‌سه‌ری خه‌مۆکی و دڵه‌ڕاوکێ له‌ رێگای رووبه‌ڕوو کردنه‌وه‌ی نه‌خۆش له‌گه‌ڵ ئه‌و کات و شوێنه‌ ھاوشێوه‌ درووست کراوانه‌ی ھه‌لومه‌رجی دڵه‌ڕاوکێی تێدایه‌. به‌ ئه‌م ئه‌زموونه‌ ھێدی ھێدی ھه‌ستی ھێمنی له‌ نه‌خۆشدا به‌ھێز ده‌کرێت و یارمه‌تی ده‌دات بۆ زاڵ بوون به‌سه‌ر ترسه‌کانیدا.

 

 گه‌شت و گوزاری گریمانه‌

چه‌ن ساڵ پێش ئێستا ره‌وانه‌ کردنی ئۆتۆمبێله‌ رۆبۆتیکه‌کان بۆ سه‌ر شه‌قام له‌لایه‌ن گوگڵه‌وه‌، بووه‌ ھۆی سه‌رسووڕمانی زۆرێک که‌س. ھیچ که‌سیش به‌ خه‌یاڵیدا نه‌ده‌ھات بینینی ئه‌و شوێنانه‌ی جیھان که‌ له‌وانه‌یه‌ ھیچ کات ھه‌لی له‌ نزیکه‌وه‌ بینینیان ده‌ست نه‌دات، به‌ شێوه‌ی به‌رجه‌سته‌ و گریمانه‌ به‌ یارمه‌تی ھێدسێتی VR ببێته‌ کردارێکی راسته‌قینه‌. ئه‌م دیارده‌یه‌ که‌ پێی ده‌وترێت گه‌شت و گوزاری گریمانه‌، بریتیه‌ له‌ زۆرێک له‌ بواره‌کان: له‌ بینینی کێبڕکێی تۆپی پێ له‌ ماڵه‌وه‌ بگره‌ که‌ له‌ ھه‌مان کاتدا به‌ یارمه‌تیی کامێرا تایبه‌ته‌کانی تۆمارکردنی وێنه‌ی ٣٦٠ پله‌وه‌ خۆت له‌سه‌ر کورسی یه‌کێک له‌ مه‌زنترین یاریگاکانی جیھاندا ده‌بینیته‌وه‌ تا گه‌شت کردن و بینینی شوێنه‌ گه‌شتیاریه‌ به‌ناوبانگه‌کانی جیھان له‌ کاتێکدا له‌سه‌ر قه‌نه‌فه‌ی ژووره‌که‌تدا نیشته‌جێیت! ئه‌مه‌ به‌ ته‌نیا چه‌ند نموونه‌ی کارایی کامێرای راستیی گریمانه‌یه‌ بۆ گواستنه‌وه‌ی مرۆڤ بۆ مه‌ڵبه‌ندێک که‌ بوونی نیه‌ له‌وێدا.

 

په‌روه‌رده‌

پۆلی ئۆنڵاینی ئینته‌رنێتی(که‌ به‌ یارمه‌تی کامێرایه‌یه‌کی دوو ره‌ھه‌ندی فێرخوازێک ده‌باته‌ به‌رده‌م مامۆستا له‌ شار یان وڵاتێکی دیکه‌دا) یه‌که‌مین ھه‌نگاوی به‌دیھاتنی فێرکاریی گریمانه‌ بوو. ئه‌مڕۆ به‌ یارمه‌تی ھێدسێتی VR قوتابیان و خوێندکاران ده‌توانن نزیکتر له‌ راسته‌قینه‌، بوونیان ھه‌بێت له‌ وانه‌کاندا و به‌ زاڵ بوون به‌سه‌ر ھه‌موو شوێنه‌که‌دا، سه‌رقاڵی خوێندن بن و ھاوکات له‌ ماڵی خۆیاندا بن. له‌ ته‌نیشت ئه‌مه‌شه‌وه‌ یاریگه‌لێگ بوونیان ھه‌یه‌ که‌ ده‌بنه‌ ھۆی پڕپیت بوونی زیاتری به‌شی فێرکاریی کتێبی وانه‌کان. یاری  Educational Mincraft به‌رھه‌مێکه‌ ئێستا زیاتر له‌ چل وڵاتدا بۆ فێرکاریی قوتابیان له‌ بواری جۆراوجۆردا به‌کار دێت. ئه‌م یاریه‌(که‌ به‌ یارمه‌تی ھێدسێتی راستیی گریمانهش ئه‌زموون ده‌کرێت) به‌ بردنی قوتابیان بۆ شوێنه‌کان و ئاشناکردنیان به‌ واتاکان، ره‌وتی فێرکاری ئاسانتر و کاریگه‌رتر ده‌کات.

 

پزیشکی

به‌ دڵنیاییه‌وه‌ ته‌کنۆلۆژیای VR کاریگه‌ریه‌کی به‌ھێزی ده‌بێت له‌سه‌ر زانستی پزیشکی. بۆ نموونه‌ چاودێریی نه‌شته‌رگه‌ری بۆ ئه‌و پزیشکه‌ پسپۆڕانه‌ی له‌ ژووری نه‌شته‌رگه‌ریدا نین یان له‌ شار و وڵاتێکی دیکه‌دان. یان فێرکاریی بۆ فێرخوازانی پزیشکی به‌ یارمه‌تی ھێدسێت که‌ ھه‌لی بوون له‌ ژووری نه‌شته‌رگه‌ری و «بینینی راسته‌وخۆی نه‌شته‌رگه‌ری له‌ نزیکه‌وه‌ و له‌ که‌شێکی به‌رجه‌سته‌دا » ده‌ڕه‌خسێنێت. ھه‌روه‌ھا VR بۆ راوێژکاریی پزیشکی ئه‌و که‌سانه‌ی توانای جووڵه‌یان نیه‌ و ناتوانن رۆژانه‌ سه‌ردانی پزیشکی تایبه‌تی خۆیان بکه‌ن، به‌کار دێت. به‌کارھێنانی ئه‌م ھێدسێته‌ له‌ دانیشتنه‌کانی چاره‌سه‌ری ده‌روونیدا په‌ره‌ی سه‌ندوه‌ و ئه‌وا ده‌ڕواته‌ ھه‌نگاوێکی راسته‌قینه‌تره‌وه‌. بۆ نموونه‌ بۆ چاره‌سه‌ری دڵه‌ڕاوکێ و خه‌مۆکی و له‌ ھه‌موو گرنگتر ترسه‌ وه‌ھمیه‌کان(فۆبیا) که‌ڵک گرتن له‌ ئه‌م ته‌کنۆلۆژیا لایه‌نگری فراوانی ھه‌یه‌. ھه‌روه‌ھا پزیشکان بۆ چاره‌سه‌ری ترس له‌ به‌رزایی له‌ چه‌ن کۆبوونه‌وه‌یه‌کدا و به‌ یارمه‌تیی به‌رنامه‌ی تایبه‌ت، نه‌خۆش ده‌خه‌نه‌ شوێنی ناڕاست و گریمانه‌ی «بوون له‌ به‌رزاییدا» و ئه‌م کێشه‌ چاره‌سه‌ر ده‌که‌ن.

 

سوپا و کاروباری سه‌ربازیی

یه‌کێک له‌ تایبه‌تمه‌ندیه‌ سه‌ره‌کیه‌کانی VR ، پێکھێنانه‌وه‌ی ھاوشێوه‌ی ئه‌و کات و شوێنانه‌یه‌ که‌ ھه‌مووکات روو ناده‌ن. به‌کارھێنانی ئه‌م ھێدسێته‌ بۆ ھاوشێوه‌سازیی ئه‌م بوارانه‌ له‌ په‌ره‌سه‌ندندایه‌: «پێکدادانه‌کان، فێرکاریی له‌ کاری ھاوبه‌شی تیمیدا، ھاوشێوه‌سازیی پرۆسه‌ی سه‌ربازی پێش روودانی، راھێنانی فڕۆکه‌وانی و لێخوڕینی ئامرازه‌کانی سه‌ربازی و وێنه‌گریی جه‌نگی».

 

 ئه‌ندازیاریی و نه‌خشه‌کێشان

ئه‌ندازیارانی بیناسازیی( له‌  کاری بینای بچووک وه‌کوو خانوه‌یه‌کی ئاسایی یان بینایه‌کی مه‌زنی وه‌کوو پرد و بینا زه‌به‌لاحه‌کان) به‌رده‌وام داڵغه‌ی ھه‌ڵسه‌نگاندنی پرۆژه‌کان و خه‌مڵاندنی ئاستی خه‌رج و دڵنیایی و به‌ره‌وپێش چوونیان ھه‌یه‌. به‌ڵام ئێستا له‌ رێگای راستیی گریمانه‌وه‌ ده‌کرێت بینای دیزاین کراو له‌ نزیکه‌وه‌ ببینن و له‌ نێویدا گه‌شت بکه‌ن و کێشه‌ و که‌م و کوڕیه‌کانی چاک بکه‌ن. ئه‌م بابه‌ته‌ ھه‌روه‌ھا له‌ نه‌خشه‌کێشانی پارچه‌کان و مۆدێله‌ پیشه‌ییه‌کاندا کارایی فراوانی ھه‌یه‌. ئه‌وه‌ی بتوانن له‌ نزیکه‌وه‌ ئه‌و شته‌ی تا ئێستا درووست نه‌کراوه‌ ببینن و ده‌ستی لێ بده‌ن و له‌ لایه‌نی جیاوازه‌وه‌ ھه‌ڵی بسه‌نگێنن، کارێکه‌ که‌ چه‌ند ساڵ پێش وه‌کوو ھیوایه‌ک خۆی ده‌نواند.

 

ته‌کنۆلۆژیای راستیی گریمانه‌ لێره بخوێنه‌وه‌

 

مێژووی راستیی گریمانه‌ لێره بخوێنه‌وه‌

         

Related Articles

Leave a Reply

Your email address will not be published. Required fields are marked *

Back to top button
error: Content is protected !!
Close